第一屆粵語兒童故事寫作比賽徵稿通知（粵文）
香港伍倫貢學院人文學院將於2022年舉辦第一屆粵語兒童故事寫作比賽。今次比賽嘅目的係為咗推廣同埋鼓勵本地原創讀物，提昇讀者透過閱讀故事書嚟到學粵語嘅興趣。參賽作品更有機會俾我哋揀嚟整有聲電子書教材，喺好多教學場所廣泛使用。
為咗推廣親子創作，今次比賽特設獎項予親子組，鼓勵小朋友發揮創意，同家長一齊創作啱晒小朋友睇嘅原創故事。
參賽須知
- 所有參加作品會一齊評核，如果作品同時參加親子組，可於報名表入面剔選（睇附件一）
- 評審會喺親子組嘅參選作品入面揀出一篇獲得「最佳親子故事創作獎」。
- 公開組比賽冇年齡限制；參加親子組嘅小朋友年齡限於5-12歲。
- 作品字數（包括標點符號）唔可以超過1500字。
- 作品對象︰
- 母語係粵語或非粵語嘅小朋友；同埋
- 粵語初階學習者
- 作品主題︰個人成長。
- 作品一定要以粵文/粵語書寫。
獎項
公開組（個人賽）
冠軍（一名）︰現金獎3000元，獎狀乙張
亞軍（一名）︰現金獎2000元，獎狀乙張
季軍（一名）︰現金獎1000元，獎狀乙張
優異獎（五名）︰現金獎100元，獎狀乙張
親子組
最佳親子故事創作獎︰現金獎1000元，獎狀乙張及豐富禮品包
徵稿日期
2022年1月17號 至3月31號
評審委員（按姓氏英文排序）
林海容女士 香港浸會大學文學院語文中心助理講師
劉擇明博士 香港教育大學文學院語言學及現代語言系助理教授
劉藴怡博士 香港伍倫貢學院人文學院助理教授
丘思陶先生 廣播劇及有聲書編劇
報名方法同作品提交
參加者一定要提妥參加表格（附件），連同作品（word）一齊電郵俾 cindyl@uow.edu.au。如果參加者喺投稿後 7 個工作日之內仲未收到確認電郵，請致電 / 電郵查詢。
來稿須知
- 參賽作品紙張大小為A4，邊界上下54cm，左右2.54cm，字號12點，用新細明體書寫。
- 參賽作品一定係從未以任何形式公開發表過，亦都冇參加過其他比賽。
- 參賽作品一定要係個人原創作品，翻譯作品 / 翻譯改寫或改編作品都唔接受。
有關比賽結果及其他事項
- 評審結果以評審委員嘅決定為準，參賽者冇得異議。
- 喺比賽結果公佈之前，參賽者唔可以公開發表參賽作品，亦唔可以用參賽作品參加其他嘅比賽。
- 大會擁有參賽作品嘅使用權，包括製作成教材。
- 得獎名單將於2021年5月喺大會網頁公佈。
- 頒獎典禮將於2021年6月喺香港伍倫貢學院舉行。
- 所有得獎者將有另外一封電郵通知。
[下載參加表格]